ती

"ती"

पहाटेच मला अवचित जाग येते....
मी अलगद उठून किचन मध्ये जातो....
ती ओट्याला बिलगून उभी असते...
काहीतरी शिजत असते...अन
तिची तंद्री लागलेली असते..
जणू स्वप्नांच्या धाग्यांनी ती,
भविष्यकाळ विणत असते...

माझ्या चाहुलीने ती भानावर येते...
पळीभर आमटी चाखत ती म्हणते...
"उठलास, आवरून घे...
मी चहा टाकते"

मी आवरून  परत किचनमध्ये येतो...
आता ती कणिक मळत असते
केसांची एक चुकार बट...
गालावर रुळत असते...
तीची परत तंद्री लागलेली असते...
जणू स्वप्नांच्या धाग्यांनी ती,
भविष्यकाळ विणत असते...

एव्हाना सूर्य उगवलेला असतो
मी चहा घेत "आजतक" पहात असतो...
ती पिलूला आंघोळ घालत असते...
त्याला पुसता पुसता परत तिची तंद्री लागलेली असते..
जणू स्वप्नांच्या धाग्यांनी ती,
भविष्यकाळ विणत असते...

मी बाईकला किक मारतो,
ती दरवाजात उभी असते..
'सांभाळून जा' तिची नजर बोलते....
मी गेटमधून बाहेर येतो
ती अजूनही तिथेच उभी..
तीची तंद्री लागलेली असते
जणू स्वप्नांच्या धाग्यांनी ती,
भविष्यकाळ विणत असते...

संध्याकाळी मी थकून येतो
ती मात्र थकलेली नसते..
तांदूळ  निवडता निवडता
पिलूचा अभ्यास घेत असते..
मी तारक मेहता पाहत असतो
ती परत किचनमध्येच जाते ...
जणू स्वप्नांच्या धाग्यांनी ती,
भविष्यकाळ विणत असते...

स्वप्नांची दुलई ओढून
रात्र झोपलेली असते...
मला अवचित जाग येते..
पिलूला कुशीत घेऊन...
ती शांत निजलेली असते...
आणि हो....
आता ती खरच ..
स्वप्नांच्या धाग्यांनी
भविष्यकाळ विणत असते...
आणि एक चुकार थेंब ...
पापणी सोडून माझ्या गालावर
ओघळलेला असतो..

-प्रशांत शेलटकर
  8600583846

जगून घे आधी

आठी घालून कपाळाला
जगू नये कधी....
सुतक आल्यागत चेहरा
ठेऊ नये कधी.....

नसेल बँक बॅलन्स...
नसेल दारात गाडी...
घर असेल साधेसुधे
नसेल घराला माडी...
गाडी साठी माडी साठी
रडू नये कधी.....
आठी घालून कपाळाला
जगू नये कधी....

सिक्सपॅक नसुदे बॉडीला
निरोगी असू दे काया....
"सलमान "तुम्ही बायकोचे
तीच तुमची "ऐश्वर्या..."
सुंदर कितीही असली तरी... शेजारणीवर मरू नये कधी...
आठी घालून कपाळाला
जगू नये कधी....

मेल्यावर मी काय होईल
विचार कसला करता...
राजे गेले सम्राट गेले
तुम तो गली का कुत्ता
कोण कोणाच नसतं
ही गोष्ट आहे साधी...
आठी घालून कपाळाला
जगू नये कधी....

माझी बायको माझी मुलं
हे भ्रम आहेत सगळे...
मेल्यावर तुमच्या इस्टेटीचा
हिशेब करतील सगळे...
जगून घ्या आनंदाने...
तुमची "बॉडी" होण्याआधी
आठी घालून कपाळाला
जगू नये कधी....
सुतक आल्यागत चेहरा
ठेऊ नये कधी.....

-प्रशांत शेलटकर
8600583846

ओढ

ओढ तुझीच ग मला
कसं सांगू तुला
जीव तुझ्यातच गुंतला
कसं सांगू तुला...

तू बोलतेस तेव्हा
सतार जणू झंकारते...
तू हसतेस तेव्हा
जणू चांदणे साकारते...
तुझ्या आठवणींचा
मनी झुलतो झुला
ओढ तुझीच ग मला
कसं सांगू तुला
जीव तुझ्यातच गुंतला
कसं सांगू तुला...

कधी वाटते तू ...
गार गार पहाट गारवा
कधी वाटते तू
मनभावन ऋतू हिरवा
तुझ्याच सवे झेलावा ग
ऋतू  चिंब ओला....
ओढ तुझीच ग मला
कसं सांगू तुला
जीव तुझ्यातच गुंतला
कसं सांगू तुला...

-प्रशांत

निरोप

दिगंताच्या प्रवासा...
निघून असे जावे...
की कुणाच्या कधी
पाणी डोळा न यावे

साथी आपले आपण
हेच एक सत्य....
प्रेम ही माया
जाणोनि हेच नित्य
मार्ग जिवनाचा
असाची क्रमावे
की कुणाच्या कधी
पाणी डोळा न यावे

जिथे जीव लावावा
तोच जीव घेतो....
दर्द आयुष्याला
तोच तो देतो....
दुःख देणाऱ्यासही
सुख देतंच जावे...
की कुणाच्या कधी
पाणी डोळा न यावे

कशाला कुणामध्ये
असे गुंतवून घ्यावे...
कशास स्वार्थास
नात्याचे नाव द्यावे
बंधनातून स्वतःच्याच
मोकळे स्वतःला करावे
की कुणाच्या कधी
पाणी डोळा न यावे

दिगंताच्या प्रवासा...
निघून असे जावे...
की कुणाच्या कधी
पाणी डोळा न यावे
-प्रशांत
8600583846

नाचू नकोस पोरी

नाचू नकोस तू पोरी
तू कशासाठी नाचतेस
हे त्यांना कधीच कळणार नाही
यांच्या कपाळावर पसरेल मात्र
एक उगाच सांस्कृतिक आठी

यांना दिसेल फक्त तुझं
तंग कापड्यातलं शरीर
तुझी जगण्याची जंग ...
कधीच दिसणार नाही..
म्हणून म्हणतो ...
नाचू नकोस तू पोरी
तू कशासाठी नाचतेस
हे त्यांना कधीच कळणार नाही
यांच्या कपाळावर पसरेल मात्र
एक उगाच सांस्कृतिक आठी

कपड्या पलीकडे ...
यांची नजर कधी गेलीच नाही
मूर्ती पलीकडला देव यांना..
कधी दिसलाच नाही...
हे शोधत बसतील ...
तुझ्या कपड्यात अश्लिलतेचे
बीभत्स पुरावे...
म्हणून म्हणतो...
नाचू नकोस तू पोरी
तू कशासाठी नाचतेस
हे त्यांना कधीच कळणार नाही
यांच्या कपाळावर पसरेल मात्र
एक उगाच सांस्कृतिक आठी

यांच्या पुस्तकी जगात...
सारं कसं छान असतं...
तुझ्या माझ्या जगाचं...
यांना कुठे भान असत...
बापाचं काळीज माझं
आतून तुटत जातं...
म्हणून सांगतो...
नाचू नकोस तू पोरी
तू कशासाठी नाचतेस
हे त्यांना कधीच कळणार नाही
यांच्या कपाळावर पसरेल मात्र
एक उगाच सांस्कृतिक आठी

-प्रशांत शेलटकर
8600583846

धर्मशाळा

माझं तिच्यावर प्रेम आहे
तिचंही असावं कदाचित..
वाटतं कधीतरी केव्हातरी
ती बोलेल हे अवचित...

तशी ती रोज दिसते
ऑफिसला जाता येता..
स्टॉप वर उभी राहून
करते मला टाटा टाटा....

ऊन असो वा पाऊस
ती वाट माझी बघते..
कधी जवळ गेलो तर
ती मोहरून जाते...

आज ती सजलीय...
नटून थटून बसलीय
सगळया नगरासाठी
सेलिब्रिटी झालीय...

ती कोण आहे ते ....
कसं सांगू तुम्हाला
पहिली नाही दुसरी नाही
ती आहे तिसरी धर्मशाळा...

रात्र कातर कातर...

रात्र कातर कातर...
सख्या मी हळवी हळवी
अजून ओली राजसा...
हळद पिवळी पिवळी..

जरी आतुर मी...
तू धीराने घे रे राजसा..
तुझ्या मिठीत बेभान मी
झाले रे राजसा....
आता नको जाऊ दूर तू
ये रे जवळी जवळी...
अजून ओली राजसा...
हळद पिवळी पिवळी..

आता हवी कशाला?
ही उगाच रे बंधने....
त्यजुनी टाक रे ही
व्यर्थ सारी वसने...
देहात भिनली रे
ही धुंदी निराळी निराळी
अजून ओली राजसा...
हळद पिवळी पिवळी..

आज तुझे नि माझे
मिलन असे व्हावे...
हिरवे चुडे माझे..
अखंड कीणकीणावे...
अशी अखंड रहावी
ही रात्र सावळी सावळी
अजून ओली राजसा...
हळद पिवळी पिवळी..

तुझ्या मिठीत मला
धुंद धुंद होऊ दे...
तुझ्या प्रेमात मला
चिंब चिंब भिजूदे...
तू कृष्ण माझा .
मी राधा बावरी बावरी..
अजून ओली राजसा...
हळद पिवळी पिवळी..

रात्र कातर कातर...
सख्या मी हळवी हळवी
अजून ओली राजसा...
हळद पिवळी पिवळी..

प्रशांत शेलटकर
- 8600583846

क्या यही प्यार है

तुला बरं नसलं
की मी  उदास होतो....
कुठेतरी शुन्यात मग
नजर लावून बसतो...
.
.
क्या यही प्यार है...😍

तुला कुठे लागलं तर
कळ माझ्या उरात येते
तूझ्या आधी माझ्याच
डोळ्यात पाणी दाटून येत...
.
.
क्या यही प्यार है...😍

आरशात कधी पाहिलं तर
मी कधी दिसतच नाही
तुझ्या शिवाय डोळ्यांना
काही सुंदर दिसत नाही
.
.
क्या यही प्यार है...😍

कधी कधी पडतात प्रश्न
हे काय असावे बरं...
तुझ्या माझ्या नात्याला
नाव काय द्यावं बरं...
.
.
क्या यही प्यार है...😍

-प्रशांत शेलटकर
  रत्नागिरी

मस्त मस्त

बरे झाले देवा ...
मी रिक्तहस्त आहे
देणे-घेणे नकोच मला
मी मस्त मस्त आहे...

खुशाल चालावे वाळूवर
त्याला पैसे पडत नाहीत
सोबतीला असो नसो कुणी
माझ कधी अडत नाही
म्हणून म्हणतो ...
बरे झाले देवा ...
मी रिक्तहस्त आहे
देणे-घेणे नकोच मला
मी मस्त मस्त आहे...

कधी पावसात चिंब भिजावे
कधी  अंगावर उन घ्यावे...
सारे कसे मोफत आहे...
म्हणून म्हणतो ...
बरे झाले देवा ...
मी रिक्तहस्त आहे
देणे-घेणे नकोच मला
मी मस्त मस्त आहे...

कधी काळोखाला सवाल करावे
अन चांदण्याचे जबाब  घ्यावे..
सवाल जबाब हे दैवी आहे..
म्हणून म्हणतो ...
बरे झाले देवा ...
मी रिक्तहस्त आहे
देणे-घेणे नकोच मला
मी मस्त मस्त आहे...

नकोच नोटा नकोत  नाणी
नाती झाली केविलवाणी
निसर्गाशीच माझे नाते आहे
म्हणून म्हणतो ...
बरे झाले देवा ...
मी रिक्तहस्त आहे
देणे-घेणे नकोच मला
मी मस्त मस्त आहे...

--प्रशांत शेलटकर

नेहरू

आपल्याकडे कोणत्याहि विषयाचं सटीक विश्लेषण करण्याची पद्धत जवळजवळ नाहीच आहे...बऱ्याच जणांची विचार करण्याची पद्धत ब्लॅक अँड व्हाइट पद्धतीची असते. कोणत्याही राष्ट्रीय व्यक्तीमत्वाचा एकतर पराकोटीचा द्वेष करायचा अथवा त्याची पूजा बांधायची अस काहीस विचित्र चाललेलं असत. गांधी , सावरकर, आंबेडकर ,नेहरू ,बोस इत्यादी व्यक्तींच्या वाट्याला हेच आलं आहे.
      एखाद्या राष्ट्रीय व्यक्तिमत्वाचा अभ्यास करायचा असेल तर अनेक संदर्भ अभ्यासावे लागतात..टिपण काढावे लागते, उलट सुलट विचार करावा लागतो. एक प्रकारचा तटस्थपणा असावा लागतो..तेवढी तयारी माझी तरी नाही आणि सोशल मीडियावर आलेल्या पोस्ट म्हणजे ज्ञान या भ्रमात मी तरी नाही. परंतु माझ्या माहिती प्रमाणे मला नेहरूनविषयी काय वाटत ते मी सांगतो.
     स्वातंत्र्यांनंतर आपल्याकडे टाचणी पण आयात करावी लागत होती.अन्न धान्य आयात करावे लागत होते एकूणच नेहरूनसमोर फार मोठे आव्हान होते. ते त्यांनी यशस्वीपणे पेलले यात वाद नाही. औद्योगिक धोरण,पंचवार्षिक योजना,यामुळे मूलभूत विकासाचा पाया घातला गेला याबद्दल मला नेहरु नेहमीच आदरणीय वाटतात. देशाची विकासनीती  त्यानी तयार केली हे नक्कीच पण ...
   परराष्ट्र धोरण आणि सामाजिक धोरण यात ते कमी पडले.याबाबतीत नेहरूंनी पूर्वग्रह ठेऊन काम केलं अस मला वाटतं.
     काश्मीर व चीनयुद्ध त्यांचेच काळात उद्भवले तिथे नेहरू पूर्ण अयशस्वी झाले कारण त्यांना या समस्यांचे आकलनच झालं नाही कारण पूर्वग्रह.
     चीन आपला बंधू आहे तो कधीच आक्रमण करणार नाही हा पूर्वग्रह आणि काश्मीर प्रश्न युनो सोडवेल व आपली आंतरराष्ट्रीय प्रतिमा उजळून निघेल हा आणखी एक पूर्वग्रह..
दुसरं म्हणजे शिवाजी त्यांना लुटारू वाटतो..याच कारण नेहरू हे पुस्तकी पंडित होते.इंग्रजांनी आणि मुघलांनी लिहिलेल्या बखरींवरून त्यांनी आपले मत बनवले असण्याची शक्यता आहे. या ठिकाणी मी थोडं विषयांतर करतो.
    म. गांधी आणि स्वामी विवेकानंद याना त्यांच्या गुरूंनी अनुक्रमे गोपाळ कृष्ण गोखले व राम कृष्ण परमहंस यांनी दोघांनाही सार्वजनिक जीवनात प्रवेश करण्यापूर्वी भारतभ्रमण करण्याचा सल्ला दिला होता ,त्यामुळे दोघांनीही संपूर्ण भारत देश फिरून समजून घेतला त्यामुळे त्यांना या खंडप्राय देशाचे आकलन झाले.देशाची परंपरा, श्रद्धा, आणि जनमानसाचा पोत समजला. त्यामुळे देशाच्या समस्यांची अचूक जाण या दोन्हीही नेत्यांकडे होती..
     याउलट नेहरू हे रेडिमेड नेते होते .त्यांचे शिक्षण विदेशात झाल्याने ते देशाकडे पाहताना विदेशी दृष्टिकोनातून पहात. त्यामुळे नेहरूंनी देशात आधुनिकतेचा पाया घातला तरी सामाजिक प्रश्नाचे त्यांचे आकलन कमी पडले..
      मी नेहरूंकडे पहाताना याच प्लस / मायनस दृष्टीने पाहतो...
       धन्यवाद
-प्रशांत शेलटकर

पर्याय

तू जितकी नजरेआड,
तितकं मला बरं आहे...
तुला विसरण्याचा ,
हाच एक पर्याय आहे...

जर तू दिसलीस तर,
अश्रू माझे बंड करतील..
माझ्याही नकळत...
डोळ्यातून वाहू लागतील..
म्हणूनच....
तू जितकी नजरेआड,
तितकं मला बरं आहे...
तुला विसरण्याचा ,
हाच एक पर्याय आहे...

मी रडलो काय हसलो काय
तुला त्याची फिकीर नसेल...
कदाचित तुझ्या तळ हातावर
माझ्या नावाची लकीरच नसेल
म्हणूनच,
तू जितकी नजरेआड,
तितकं मला बरं आहे...
तुला विसरण्याचा ,
हाच एक पर्याय आहे...

खोटी वचने खोटा दिलासा
खोटा तुझा जिव्हाळा....
खोट्या मिठीत गुदमरला..
खोटाच तुझा उमाळा..
म्हणूनच..
तू जितकी नजरेआड,
तितकं मला बरं आहे...
तुला विसरण्याचा ,
हाच एक पर्याय आहे...

-प्रशांत शेलटकर
  रत्नागिरी

ती

"ती"

खरं सांगू मित्रा,
तू माझं ऐक...
एखादीच असते सुंदर,
बाकी सगळ्या "फेक"...

एखादीच सुंदर ''असते"
बाकी फक्त सुंदर "दिसतात"
पार्लरच्या जादूने...
पोर बिचारी नक्की फसतात...
म्हणून सांगतो मित्रा,
तू माझं ऐक...
एखादीच असते सुंदर,
बाकी सगळ्या "फेक"...

लाल चुटुक ओठ अन
नैन शराबी शराबी...
फेशियल च्या किमयेन
गाल गुलाबी गुलाबी
म्हणून सांगतो मित्रा,
तू माझं ऐक...
एखादीच असते सुंदर,
बाकी सगळ्या "फेक"...

चकाकणारे सगळंच
सोनं नसतं कधी..
उन्हात चमकली तरी
'गार" हिरा नसते कधी
म्हणून सांगतो मित्रा,
तू माझं ऐक...
एखादीच असते सुंदर,
बाकी सगळ्या "फेक"...

चेहऱ्यावरचा रंग उद्या
नक्कीच उडून जाणार आहे
चेहऱ्यावर एक छानसं
स्मित मात्र उरणार आहे
म्हणून सांगतो मित्रा,
तू माझं ऐक...
एखादीच असते सुंदर,
बाकी सगळ्या "फेक"...

प्रेम तिच्यावरच कर
जी तुझ्यावर करते
आणि मेकअप शिवाय
जी तुला "ऐश्वर्या" वाटते
म्हणून सांगतो मित्रा,
तू माझं ऐक...
एखादीच असते सुंदर,
बाकी सगळ्या "फेक"...

-प्रशांत शेलटकर
  रत्नागिरी