डीपी बदलतो तेव्हा...☺️

डीपी बदलतो तेव्हा...☺️

तुझा डीपी इतका सुरेख

की लिहीन म्हणतो निबंध

लागेल कदाचित पुरवणीही

शब्दांचा करीन गुलकंद

हसतात तर सगळेच मानव

पण तुझे हसणे खास आहे

काही म्हणा मात्र तुझ्यात

मोनालीसाचा भास आहे

सगळ्याच  उपमा अलंकार

आता बाहेर काढणार आहे

नाहीतर तुझ्यापर्यंत येण्याचा

चान्स कुठे मिळणार आहे?

बाय द वे तुझे केस म्हणजे

सावन की काली घटा जणू

ओठ म्हणू की काय म्हणू?

हे  प्राजक्ताचे देठ जणू

भुवयांचे धनुष्य म्हणू की

नजरेचे भेदक बाण म्हणू

मेनकेलाही कॉम्प्लेक्स यावा

अशी सौन्दर्याची खाण म्हणू

बघ ना तुझा डीपी बघून

कल्पनेचा मोर कसा नाचतो

नाचता नाचता बिचारा

ये दिल मांगे मोअर म्हणतो

आता काही चतुर मोर 

इनबॉक्स मध्ये येतील

जेवलीस का म्हणून अगत्याने

चौकशी नक्की करतील

नकोच काही सांगू त्याना

ते पान वाढायला घेतील

नको नको म्हणताना 

आग्रह करून वाढतील

जाम कंटाळीस ना तू ?

 मग ऐक माझा सल्ला

ऐकलास माझा सल्ला

तर थांबेल हा कल्ला...

नवऱ्यासोबतचा छान फोटो

पुढच्या वेळी ठेव डीपी

इतका छान असू देत की

मोरांचे  वाढेल बीपी

म्याओ म्याओ करत

मोर रानात जातील

सुटले बाबा एकदाची म्हणून

तू मोकळा श्वास घेशील...

© प्रशांत शेलटकर

    8600583846

ए जिंदगी..

ए जिंदगी...

ए जिंदगी चल...

अब बिछड जाते है हम

कुछ खुशी कुछ गम

यही पे छोड जाते  है हम..

ए जिंदगी चल..

बहोत सारे सपने

देखे थे हमने..

कुछ पुरे हुए..

कुछ अधुरे रह गये..

अब सिर्फ यादो मे

समेट जाते है हम

ए जिंदगी चल...

अब बिछड जाते है हम

कुछ खुशी कुछ गम

यही पे छोड जाते  है हम..

ए जिंदगी चल..

कुछ सपने बिखर गये

कुछ अपने बिछड गये

कुछ फुल खिलते खिलते

यु ही मुरझा गये...

अब इस बेकार की बातो में

क्यू उलझे हुए है हम

ए जिंदगी चल...

अब बिछड जाते है हम

कुछ खुशी कुछ गम

यही पे छोड जाते  है हम..

ए जिंदगी चल

अब दिन ढल चुका 

कारवा बिछड गया

अब रात दस्तक दे रही है

अब साया भी बिछड गया

चल अब एक दुसरेसे

अलविदा करते है हम

ए जिंदगी चल...

अब बिछड जाते है हम

कुछ खुशी कुछ गम

यही पे छोड जाते  है हम..

© प्रशांत शेलटकर

    8600583846

बेकाबू..

बेकाबू...

क्लास कडून मास कडे जाताना नेहमीच गुणवत्ता घसरत जाते..जसा आपला लोकसंग्रहाचा परीघ वाढत जातो तसे आपले टीकाकार वाढत जातात. क्लासचे मास मध्ये रूपांतर होताना तो एकतर उच्चकोटीचे विधायक होतो अन्यथा नीचकोटीचा विघातक होतो. गर्दीला तिचे म्हणून असे एक सामूहिक मन असते. गर्दीचा बुध्यांक कमी असतो..तर्कबुद्धी अत्यन्त मंद असते. तिचे नेतृत्व करणारा तिला स्वतःला हवे त्या दिशेला नेऊ शकतो .आपले विचार गर्दीवर प्रोजेक्ट करू शकतो.नेत्याच्या इच्छेप्रमाणे गर्दी वागते. म.गांधीच्या आवाहनाने हजारो सत्याग्रही तुरुंगात जात हे विधायक प्रोजेक्शन चे उदाहरण आहे तर दंगल हे विघातक प्रोजेक्शन आहे.

     सोशल मीडियावर देखील जसे जसे तुंमचे फ्रेंड सर्कल वाढत जाते तसे तसे कॉमेंट्सचा दर्जा घसरत जातो.अगदी    फ्रेंड सिलेक्शन पारखून केलं तरी एखादी पोस्ट नकळत कोणाला तरी हर्ट करते..पण तुम्ही जर सामाजिक ,धार्मिक आणि राजकारण या क्षेत्रात सहभागी असाल तर साहजिकच तुमची फ्रेंड लिस्ट मोठी असते.त्यामुळे भिन्न भिन्न मते असलेल्या लोकांच्या अगदी टोकाच्या कमेंट्स येतात.कारण धर्म आणि राजकारण या बद्दल लोकांची मते अगदी ठाम असतात.शॉर्टटर्मला ती बदलत नाहीत पण सततच्या प्रोजेक्शन मुळे ती लॉंगटर्मला बदलू शकतात..पोस्ट कर्ती जर स्त्री असेल तर काही वेळा अश्लील कॉमेंट्सपण येतात.माणसातले जनावर बाहेर येते. गर्दी बेफाम असते. तिला सद्सद्विवेक बुद्धी नसते. फेस टू फेस कॉन्व्हर्सेशन मध्ये थोडी बंधने येतात पण व्हरच्युल कॉन्व्हर्सेशन मध्ये लोक मोकाट होतात. प्रत्यक्ष गर्दी एक नेता हँडल करत असतो पण व्हरच्युल गर्दी सगळेच नियंत्रित करायचा प्रयत्न करतात.त्यात मीच कसा बरोबर हे सिद्ध करायच्या प्रयत्नात माणसे घसरतात..स्वतःचे मत अत्यन्त प्रिय असल्याने त्याला कोणी क्रॉस केले की राग येतो.कारण मत म्हणजे स्वतःचे भावविश्व असते. ते आपण स्वतःला हवे तसे ,स्वतःच्या सोयीने,आणि स्वतःला अनुकूल असे बनवलेले असते आणि आपल्या मते ते आणि तेच सत्य असते..मग कोणी क्रॉस गेलं की आपल्या भावविश्वाला धक्का बसतो. राजकारण आणि धर्म या बाबतीत हे जास्त होते..

-प्रशांत शेलटकर

हाजमोला...

हाजमोला....😊

नाईस.. ऑसम..वाह वाह

असलं मी काही म्हणणार नाहीये

तू तुझा डीपी कितीही

सुंदर (?) ठेवलास तरीही...

मी तुला गुड मॉर्निंगसुद्धा 

करणार नाहीये..

सकाळ किती का सुंदर असेना

आणि हो ...

कशाला ते गुड नाईट...

सगळ्याच नाईट एकसारख्या..

हॅव अ नाईस डे

कशाला हवं ना प्रत्येक दिवशी

वैतागलेला आणि विस्कटलेले

दिवस आज काल खूपच..

फक्त डीपिसाठीचे ते

टुचुक भर स्माईल..

तेच  ते धार गेलेले बोथट झालेले

नजरेचे तथाकथित बाण...

कोण शिंचा घायाळ होणार?

व्हर्चुअल फेटे उडवायला

तू कुठल्या गल्लीतील

अमृता..माधुरी.. गौतमी

गेला बाजार सुरेखा..

तूला म्हणे आजकाल

लाईकचेच ओझे झालंय

तुझ्या ओझ्यात भर अजून ?

छे छे असलं पाप 

नाही होणार माझ्याकडून

गोड गोड कमेंटीची

बासुंदी वाढायला

वाढपी खोळम्बले आहेत

सोशल मीडियाच्या मंडपात

तू चूळ भरलीस तरी

ऑसमच्या पायघड्या

तयार आहेतच ग..

पण काय असत ना

स्तुतीचा ओव्हरडोस

रोजचाच असतो ग

अपचन झाले तर असावी

कधीतरी केव्हातरी

 टीकेची हाजमोला

एकदम पाचक आणि कडक

म्हणून तर हे सर्व....

कळतंय ना??

😄😄😄😄😄😄

-प्रशांत शेलटकर

अंधश्रद्धा

अंधश्रद्धा निर्मूलन समितीचे आपले नाव बदलून कुप्रथा निर्मूलन समिती असे ठेवणे उचित ठरेल असे मला नम्रतेने वाटते. समितीने अनेक समाजविघातक कुप्रथा बंद केल्या आहेत. आज पर्यंत काम उत्तम केले आहे..पण नाव शब्दशः पटत नाही . 

     श्रद्धा म्हणजे प्रचलित वैज्ञानिक दृष्टिकोनाच्या विरोधात  जाऊन एखाद्या व्यक्ती किंवा घटनेवर ठेवलेला विश्वास.हा विश्वास कार्यकारण भावाच्या तत्वावर अवलंबून नसतो.तो तर्क कसोट्या लावून ठेवलेला नसतो. तो तर्काच्या विविध चाळण्या वगळून थेट ठेवला जातो.प्रचलित वैज्ञानिक दृष्टिकोन हा शब्द यासाठी वापरला आहे की जसे जसे विज्ञान पुढे सरकत जाते तसे तसे त्याचे निकष बदलत जातात. निसर्गाची कोडी उलगडत जातात. सुरवातीला अणू हा पदार्थाचा सूक्ष्मतम भाग मानला जायचा नंतर कळले की अणूचे सुद्धा प्रोटॉन,इलेक्ट्रॉन असे अधिक सूक्ष्म भाग असतात. अशा प्रकारे विज्ञान पुढे पुढे सरकत जाते. भविष्यात विज्ञान स्वतःच कदाचित ईश्वराचे अस्तित्व मान्य करेल.पण प्रचलित वैज्ञानिक निकषात ईश्वराचे अस्तित्व नाही. आणि ते  वैज्ञानिक परिघात खरे आहे.

    पण श्रद्धेच्या प्रांतात ईश्वर आहे हा विश्वास आहे.मग तो मूर्तीरूपात असो ,अल्लाह असो वा आकाशातला बाप असो..यात श्रद्धा आहे. अंधश्रद्धा हा शब्द मला वाटत समितीनेच निर्माण केला असावा. ज्या वेळी समिती स्थापन झाली त्यावेळची एकूण सामाजिक परिस्थिती पाहता श्रद्धा आणि अंधश्रद्धा असे दोन काल्पनिक गट करणे समितीला योग्य वाटले असावे.ज्या काही समाज विघातक रूढी ,परंपरा आहेत त्या सर्व अंधश्रद्धा या गटात टाकण्यात आल्या असाव्यात. त्या काळात ते योग्यच होते. देवदासी सारखे प्रश्न समितीने प्रभावीपणे सोडवले.

    पण नावाचा विचार केला तर त्यात एक प्रकारचा विरोधाभास आहे..वैज्ञानिक निकष लावले तर प्रत्येक श्रद्धा अंधच म्हणायला हवी. जरी श्रद्धेचे श्रद्धा आणि अंधश्रद्धा असे दोन प्रकार केले तर श्रद्धा ठेवणे हे सुद्धा विज्ञान विरोधी आहे फक्त अंधश्रद्धा नव्हे. इतरांना आणि स्वतःला उपद्रव देणारी श्रद्धा म्हणजे अंधश्रद्धा  असे मानले तर व्यक्तीला आणि समाजाला मानसिक आधार देणाऱ्या श्रद्धेबद्दल समितीचे मत काय आहे. या श्रद्धेला विरोध नसेल तर मग प्युअर वैज्ञानिक दृष्टीकोनाचे काय? मानसिक आधार देणारी, देवावरील सकारात्मक श्रद्धा समितीला मान्य असेल तर विज्ञान सध्यातरी देव मानत नाही. भविष्यात ते तसेच राहील असे मानायचे पण कारण नाही. 

     पण सध्या अंधश्रद्धा निर्मूलन समिती हे नाव बदलून कुप्रथा निर्मूलन समिती असे नाव दिल्यास ते अधिक अचूक होईल असे वाटते.

   टीप- माझी शंका फक्त नावासाठी आहे, समितीच्या कामाला नाही.

-प्रशांत शेलटकर

तू असताना

💞...तू...💕

तू आठवतेस

तू हसवतेस

तू रडवतेस सुद्धा

तू नसताना..

तुझा आवाज

तुझा साज

तुझ्या बटा

डोळ्यासमोर असतात

तू नसताना...

तुझी मैत्री?

की तुझं प्रेम?

प्रश्न पडतात मला

तू नसताना...

हे स्पंदन

ही धडकन

थांबतच नाही

तू नसताना

हे वैराग्य

ही विरक्ती

ही सगळी नाटकं

फक्त तू नसताना...

हा पाऊस

हा गारवा

हा उनपाऊस असावा

तू असताना...

हा वसंत

हा आसमंत

बहरून जावा

तू असताना...

हा हळवेपणा

हा भारले पणा

ह्या ओल्या पापण्या

फक्त तू नसताना

तुला कसं सांगू

तुला केव्हा सांगू

आणि मुळात का सांगू

तू नसताना...

पण कधीतरी

केव्हातरी..कुठेतरी

विचारीन म्हणतो तुला

तू असताना...

❤️-प्रशांत ..💕

निरामय

निरामय...

हल्ली माझा येशू झालाय..

उपहासाचे खिळे थेट 

अगदी मेंदूत मारले आहेत तरी

देवा क्षमा कर त्याना

ते जे काही करत आहेत..

ते त्यांचे त्याना कळत नाहीये..

असे सर्व मंगल पसायदान

मी मागत असतो आजकाल शांतपणे..

द्वेष आणि तिरस्काराचे..

विषारी साप सहज खेळवतात

काही सोशल गारुडी आजकाल

आणि त्यांच्या पुंगीवर डोलत बसतात

त्यानीच पाळलेली लाचार गांडूळे..

आणि हो त्या गांडुळानाही आजकाल

जातिवंत नाग असल्याची स्वप्ने पडतात

हरकत नाही ना पडू द्या त्याना ती स्वप्ने

हक्कच आहे तो सर्वाना अगदी गांडुळांनाही

मी मात्र मागत असतो पसायदान..

अगदी गांडूळांसाठीही तितक्याच आर्ततेने..

आजकाल मी बदललोय..

जग बदलण्यापेक्षा स्वतः बदलेले बरं..

प्रेम करणारे प्रेमच करणार

द्वेष करणारे द्वेषच करणार

राग करणारे रागच करणार

झोंबी कधी बदलत नसतात

झोंब्याना दुसरी बाजू नसते

झोंब्याना दुसरी दिशा नसते

झोंब्यांची वेगळी दशा नसते

त्यांचे मतपरिवर्तन होत नसते

मुदलात त्याना त्यांचे मत नसतेच

प्री-प्रोग्राम केलेला माईंड सेट

असतो फक्त त्यांच्या पाशी..

वळसा घालून मी पुढे जातो आजकाल

भवतु सब्ब मंगलम म्हणून..

क्रियेला प्रतिक्रिया दिलीच पाहिजे

अस काही नसते...

इट का जबाब पत्थर से

असंही काही नसते..

कोणाची तरी जिरवायची बौद्धिक खाज

आता विरून गेलीय..

का कोणास ठाऊक ?

अंतःकरणाची तळी

करुणेने भरून गेलीय..

सर्वे संतु निरामय भावना

अगदी काठोकाठ भरून आलीय

येशू,तथागत आणि ज्ञानेश्वर

यांनी अगदी पोटाशी धरलंय मला

आता अगदी शांत शांत वाटतय..

-प्रशांत शेलटकर

 8600583846

स्किझो...

स्किझो....

माझ्यातला मी

मलाच प्रश्न करतो

कोण तू?

मी स्किझो...

माझ्यातला तो 

मलाच उत्तरतो

तो तूच...

तोच म्हणतो मला

तू सिद्धपुरुष..

तुला दिसत सगळं

जे जगाला नाही दिसत..

भयंकर हसून

मी म्हणतो मलाच

नाही रे... मी स्किझो...

कळत नाही रे

माझे मला 

मी हा की मी तो?

हे सत्य की ते सत्य?

कोणत्या सत्याशी

स्टिकप राहू...?

हेच सत्य...

कारण दुसरे असत्य

दुसरे असत्य

कारण हेच सत्य

साला केमिकल लोचा

डॉक्टर म्हणालेच परवा

स्किझोफ्रेनियाची केस आहे

म्हणे माझ्यात दोघेजण आहेत

साले काय जोक करतात..

जगातले सगळेच स्किझो...

आत एक आणि बाहेर एक..

पुढ्यात एक मागे एक..

मी मात्र प्रामाणिक

माझ्यातल्या दोघांसोबत

दोघांचे अस्तित्व..

प्रखर वास्तव

झगझगीत..

दुपारच्या उन्हासारखे..

म्हणे मी स्किझो..

अरे तुम्ही पण स्किझोच

मेंदूतली स्वार्थाची पेशी

जिवंत असलेले..

बदमाश स्किझो..

व्याख्येच्या पलीकडले...

आणि मी????

कोण मी?????

मी स्किझो.....

केसपेपर वर पाहिलं मी परवा

-प्रशांत शेलटकर

8600583846

ती आवडते मला...

ती आवडते मला...

ती आवडते मला

जशी आहे तशी

जिथे आहे तिथे..

अगदी पाठमोरी सुद्धा

ती आवडते मला...

ती विस्कटलेल्या

केसांची राजकन्या

ती खट्याळ हास्याची 

निरागस निर्मलकन्या

ती आवडते मला..

तिचा आवाज..

कानात घंटा किणकिणतात

हा कानातला रोमान्स

आवडतो मला ..आणि ती?

तीही आवडते मला...

ती सुखाचे डेस्टिनेशन

छत्तीस गुणांचे परफेक्शन

नावडण्या सारख काहीच नाही

ती आवडते मला...

तिची ती छचोर बट

राग करतो मी तिचा

किती सलगी करावी ना गालांशी

पण त्या बटेसहित 

ती आवडते मला

फक्त आवडते की 

अजून काही?

की खोल खोल मनात

रुतले काही?

माहीत नाहीच तरीपण

ती आवडते मला..

डोळे मिटले की

उत्तर मिळते

मग का उगाचच 

 व्यक्त व्हायचे असते

फक्त तिला हेच सांगायचे की

ती आवडते मला...

ती आवडते मला...😊

-प्रशांत ❤️