खूप सुखी आहे मी
जेव्हा ती म्हणाली
नेमकं त्याच वेळी
तिच्या डोळ्यात धूळ गेली...
चटकन बाजूला होत
जेव्हा तिने डोळे पुसले
न सांगताच तिच्या
सुखाचे कारण कळले
नसणारी सुखं..
हवीहवीशी वाटतात,
असणारी दुःख,
नको नकोशी वाटतात...
तरीही ती...
खूप सुखी आहे म्हणाली
नेमकं त्याच वेळी
तिच्या डोळ्यात धूळ गेली...
मी म्हणालो तिला,
इतकं सुख बरं नव्हे,
असे डोळे भरून येणं
नक्कीच चांगलं नव्हे
डोळ्यातलं पाणी पुसून
ती इतकंच म्हणाली..
मी केव्हाच माझ्या सुखाची
व्याख्याच बदलली...
आता जेव्हा कधी ती
अवचित भेटते,
डोळे भरून येईपर्यंत
खूप हसून घेते..
न जाणो अचानक
डोळ्यात धुळीचे कण जातील
आणि मग परत...
सुखाच्या व्याख्याच बदलतील
-प्रशांत शेलटकर
8600583846
