स्पेस
क्षणभर तुझ्यासाठी वेळ
सखी कधी देशील का?...
क्षणभर स्वतःची खुशाली तू
स्वतःलाच विचारशील का?
नवऱ्याच ऑफीस अन
मुलांच्या शाळा....
तूच सांभाळतेस ग
सर्वांच्या वेळा...
स्वतःसाठी वेळ कधी काढशील का?
क्षणभर स्वतःची खुशाली तू
स्वतःलाच विचारशील का?
सुनबाई माझी छान आहे
सासू आजारपणातच म्हणते
आणि नवऱ्याला तर तू
फक्त रात्रीच सुंदर दिसते...
स्वार्थाची दुनिया तुला
कधी समजेल का?
क्षणभर स्वतःची खुशाली तू
स्वतःलाच विचारशील का?
सजून बघ फक्त स्वतःसाठी
दुसऱ्यासाठी तर सजतेसच
जगून बघ स्वत:साठीच..
दुसऱ्यासाठीच तर झिजतेसच
दुसऱ्यासाठी स्पेस देतेस
स्वतः साठी देशील का?
क्षणभर स्वतःची खुशाली
स्वतःलाच विचारशील का?
दुसऱ्यासाठी करताना ग
आयुष्य तुझं सरून जाईल
तुझ्यासाठी कुणाचे ग
दोन डोळे भरून येतील ?
तुझ्या डोळ्यात तुझ्यासाठीच
स्वप्न कधी पाहशील का?
क्षणभर स्वतःची खुशाली
स्वतःलाच विचारशील का?
-प्रशांत शेलटकर
रत्नागिरी
No comments:
Post a Comment