निसटलेले क्षण

निसटलेले क्षण
निसटू द्यावे...
विस्कटलेले आयुष्य
विस्कटू द्यावं...
शाश्वत तर काहीच नाही
जे न झालं आपलं कधीच
ते अलगद सोडून द्यावं...

जे आपले मानले
तेच सोडून गेले...
हिशेब त्यांनी ,
चुकते केले...
त्यांना तसेच जाऊ द्यावं
जे न झालं आपलं कधीच
ते अलगद सोडून द्यावं...

ज्यांना यायचंच नसत
ते कधीच येत नाहीत
ज्यांना जायचंच असत
ते कधीच थांबत नाहीत
जायचय त्यांना जाऊ द्यावं
यायचंय त्यांना येऊ द्यावं
जे न झालं आपलं कधीच
ते अलगद सोडून द्यावं...

कारण असल्याशिवाय
कोणी जवळ येत नाही
तारण असल्याशिवाय
कोणी काही देत नाही
जाता जाता आयुष्याला
एक छानसं स्माईल द्यावं
जे न झालं आपलं कधीच
ते अलगद सोडून द्यावं...

-प्रशांत शेलटकर
8600583846

माणसे

चार पैसे आले की
बदलतात माणसे...
रंकाचे राव होताना
बदलतात माणसे..

दमडी नसताना खिशात
भलतीच नम्र होतात माणसे
तोच खिसा भरला की
माजोरी होतात माणसे...

नसते कोणीच जवळ तेव्हा
ओळख दाखवीती माणसे
मग गर्दीत धनवानांच्या
अनोळखी होतात माणसे

जिथे शारदा रमे लक्ष्मी सह
तिथे नांदती साधी माणसे..
जिथे केवळ नांदते लक्ष्मी
तिथे केवळ धनवेडी माणसे

आज राव उद्या रंक हे
जी जाणती माणसे
तीच प्रिय होतात जनीं
अन्य केवळ अज्ञानी माणसे

-प्रशांत शेलटकर
8600583846

पेच

आयुष्य एक पेच आहे
हे जगणे तेच तेच आहे
मागचा नेहमीच शहाणा
पुढच्यास मात्र ठेच आहे..

हे जगणे व्हावा एक सोहळा
असे कधी जगणे झालेच नाही
हसणे झाले मुश्किल आणि
रडणे मात्र रोज तेच आहे..

आखलेले बेचव जगणे
भूमितीत बांधलेले...
आयुष्य फक्त लांबलेले
खोलीचे माप तेच आहे

तीच माणसे गांजलेली
तीच तत्वे गंजलेली..
विठूच गेला वैकुंठाला
बडवे मात्र तेच आहे..

तीच जनता तेच नेते
तेच प्रश्न तीच उत्तरे
तेच गाजर तीच वचने
फसणेही तेच तेच आहे

-प्रशांत

मुग्ध मौन

प्रत्येकवेळी बोललं पाहिजे
अस काही नसतं..
गर्दीत चालताना तुझा हात
हातात घेणं पुरेस असतं..

प्रत्येकवेळी बोललंच पाहिजे
असं काही नसतं...
गालावर आलेली तुझं बट
अलगद बाजूला करणं पुरेस असतं

प्रत्येकवेळी बोललंच पाहिजे
असं काही नसतं...
कधी कधी तुला फक्त,
डोळ्यात साठवणे पुरेसं असतं

प्रत्येकवेळी बोललंच पाहिजे
असं काही नसतं...
तुझा हात  हातात घेऊ
तो स्पर्श अनुभवणं  पुरेसे असतं

प्रत्येकवेळी बोललंच पाहिजे
असं काही नसतं...
कधी तुझ्या ओठांना
ओठांनीच  टिपणं पुरेसं असतं

प्रत्येकवेळी बोललंच पाहिजे
असं काही नसतं...
कधी कधी असं मौनातच
मुग्ध असणं पुरेसं असतं

-प्रशांत शेलटकर
8600583846

जसा आहेस तसा

जसा आहेस तसा...

इस्त्री तुझ्या चेहऱ्याची
विस्कटू दे ना जरा
जसा तू आहेस तसा
दिसू दे ना जरा....

कशास हवीत रे बंधने
आपल्याशीच बोलताना
झुगारून खोटी बंधने
मोकळा हो ना जरा...
जसा तू आहेस तसा
दिसू दे ना जरा....

बोललास काही वावूगे
खंत नाही जराही मला
बोललास  रे खरेखुरे
यात आनंद लपला खरा
जसा तू आहेस तसा
दिसू दे ना जरा....

बोल तू तुटके फुटके
शब्दांत हो जरा मोकळा
संवाद साधण्यास का रे
लागतो इमोजीचा आसरा
जसा तू आहेस तसा
दिसू दे ना जरा....

कधी वाटले हसावेसे
तर मनसोक्त हस जरा
दाटून आले आभाळ जर
मनसोक्त असा बरस जरा
इस्त्री तुझ्या चेहऱ्याची
विस्कटू दे ना जरा
जसा तू आहेस तसा
दिसू दे ना जरा....

-प्रशांत शेलटकर
8600583846