मनातलं #-2

मनातलं # - 2

शून्य म्हणजे काहीही नाही.. Absolutely nothing..गंमत म्हणजे काहीही नाही हे सिद्ध व्हायला काहीतरी असावे लागते त्याशिवाय काहीही नाही हे सिद्धच होत नाही.पुन्हा त्यात ट्विस्ट म्हणजे "काहीतरी" आहे हे सिद्ध व्हायला   "काहीतरी" नसावं लागतं. अंधार हा प्रकाश सापेक्ष आहे आणि प्रकाश हा अंधार सापेक्ष आहे.अंधाऱ्या खोलीत लाईट लावला की प्रकाशाचे अस्तित्व जाणवते आणि लाईट ऑफ केला अंधाराचे अस्तित्व जाणवते.मग सत्य काय ? अंधार की प्रकाश? हा एक कापुसकोंड्याचा प्रश्न..

      निराकार म्हणजे ज्याला आकार नाही ते? मग ज्याला आकारच नाही ते समजून कसे घ्यायचे? निराकार म्हणजे निर्वात पोकळी? मग ही निर्वात पोकळी समजून घ्यायला काहीतरी डोळ्यासमोर येणे नैसर्गिक आहे ना? त्याशिवाय समजणार कसे ? एका कोऱ्या कागदावर मधली जागा सोडून चारी बाजूला  डिझाइन काढली तर डिझाइन सोडून उरलेली जागा म्हणजे निर्वात पोकळी.. पण ती केव्हा जाणवेल ? जेव्हा डिझाइन असेल तेव्हाच ना? म्हणजे " नाही" हे सिद्ध व्हायला " आहे" चे अस्तित्व  असावे लागते , नास्तिक आणि आस्तिक या संकल्पना अशाच असतील का?..

   ....अर्थात हे सगळे चिंतन..मनन मानवी मेंदूच्या मर्यादित कक्षेतले आहे. मानवी मेंदूला जे आकलन होईल तेच सत्य या गृहीत तत्वावर आधारलेले आहे, कारण तसे गृहीत धरणे अपरिहार्य आहे. काहीतरी बेस असल्याशिवाय चिंतनाची इमारत उभी रहात नाही.पण हा बेस काही पूर्ण सत्य नाही, मानव सोडून इतर प्राण्यांच्या विशेष क्षमता पहिल्या तर या विश्वात मानवी आकलनाच्या पलीकडे खूप काही आहे हे दिसून येते.पण अज्ञानात आनंद या कल्पनेत रमून माणूस हा सर्वात बुद्धिमान प्राणी आहे या समजाला उराशी कवटाळून बसण्यास तूर्तास तरी हरकत नाही..पुढचे पुढे...

@ प्रशांत शशिकला शशिकांत

8600583646