कविता

कविता...

मौनाची तटबंदी तोडून
"शब्द"म्हणाला "प्रतिभेला"...
माझं तुझ्यावर प्रेम आहे,
तुझं माझ्यावर आहे का?

तुझ्याविना मी व्यर्थ आहे
तुझ्याविना काय अर्थ आहे
तुझ्या विना "प्रतिभे"..
मी केवळ कलेवर आहे

काना, मात्रा अन वेलांटी
तन हे माझे तुझ्याचसाठी
अक्षरे सजवली  मनात मी
"प्रतिभे" ग तुझ्याचसाठी

शब्दास मग बोले प्रतिभा
सांग रे माझ्या शब्दराजा
अबोल जरी मी साजणा
व्यक्त होईन का तुझ्याविना

शब्द- प्रतिभेचे मिलन झाले
द्वैताचे मग अद्वैत झाले...
शब्द-प्रतिभेच्या पोटी मग...
काव्यबालक जन्मास आले..

-प्रशांत शेलटकर