हस जरा...☺️
आवडेल विनोद मला जो
तुला तो रुचेलच असे नाही
पटेल मला मनापासून जो
तुला तो पटेलच असे नाही
हसेन मी ज्या विनोदाला
तिथे तू मक्ख बसशील कदाचित
उडत डोक्यावरून तुझ्या तो
चक्क जाईल रे कदाचित
तरी मी हसलो तू ही हसावे
अस मुळीच हट्ट नाही..
आवडेल विनोद मला जो
तुला तो रुचेलच असे नाही
हसतात कोणी मोकळे
कोणी हसतात गाली
हसता हसता कोणी
देतात बघा टाळी
मी दिली टाळी जर तुला
तुही द्यावी असे नाही
आवडेल विनोद मला जो
तुला तो रुचेलच असे नाही
कोणास आवडेल शब्दकोटी
कोणास भावतो प्रसंगनिष्ठ
हसून घ्यावे मनसोक्त
रहावे निजछंदास एकनिष्ठ
मी भिजलो नखशिखांत
तू भिजावेच असे नाही
आवडेल विनोद मला जो
तुला तो रुचेलच असे नाही
दुःख ,दारिद्र्य, वंचना, संकटे
असतातच रे सोबतीला
म्हणूनच देवाने माणसाच्या
दिला विनोद दिमतीला
मिटतील सर्व विवंचना
असा मुळीच भ्रम नाही
क्षणभर जरी त्या विसरल्या
तरी नवऊर्जा मिळून जाई
सोड रे सोड चिकित्सा
प्रतिमेतून ये बाहेर जरा
बघ रे बघ आजूबाजूला
हसतोय माहोल सारा
हसतो फक्त माणूस
काय तू माणूस नाही?
नसशील तर हसण्याचा
माझा उगाचच हट्ट नाही
आवडेल विनोद मला
तुला तो रुचेलच असे नाही
पण हसण्यासारखे मित्रा
दुसरे औषध बघ नाही...
😄😄😄😄😄
© प्रशांत शेलटकर
8600583846
No comments:
Post a Comment