कुंपणावरच्यास....
भलताच बिझी मित्रा
पण स्टेटस मात्र बघतो
कळते मला अरे वेड्या
तू अंदाज मात्र बांधतो..
बंद करतोस दरवाजा
अन् खिडकी उघडी जराशी
नसतोच मी कशातही
करतो कशास रे मखलाशी..
स्टेटस बघून माझे
तू बांधतोस जरी इमले
जरा धक्का लागताच
ढासळतात ओले किल्ले
लपून काय खेळतोस
तू डबा ऐस पैस
अरे ये ना समोर असा
जरा मोकळा बैस
मला काय त्याचे
सोड रे अलिप्तपणा
त्यात कसला आला
कर्माचा शहाणपणा
अंदाज कोणाचा कधी
कोणालाही ना कळला
स्टेटस वरून वेड्या
का अखंड माणूस कळला?
भिडावे समोर आणि
भांडावेही मनसोक्त..
बोलूनच होते मोकळे
मन हे मुक्त मुक्त..
हे पद प्रतिष्ठा पैसा
आहे श्वास जोवरी
झाल्यावर बॉडी तुझी
फक्त चार खांदेकरी
म्हणून एक सल्ला तुला
नको बसू कुंपणावरी.
ये असा गर्दीत ये
आहेस जिवंत तोवरी ...
@ प्रशांत
