तटस्थ..

तटस्थ...

निवडून घ्यावे कांदे
तशी निवडून घेतो बातमी
तरी म्हणे मी तटस्थ
नाही कुणाची गुलामी

फेकून मारू "लिंका"
विरोधकांची जाळू लंका
आपलीच वाजू दे टिमकी
आपलाच झडू दे डंका

कोण जिंकले कोण हरले
याचाच पत्ता नाही..
तरीही करू गंभीर चर्चा
अरे ही काय थट्टा नाही

रंगपेटीत दोनच रंग
पांढरा आणि काळा
सोबत दोनच पक्षी
कावळा आणि बगळा

मेंदूत यांच्या खिळे ठोकले
डावे उजवे फक्त
कोण कोणाचा गुलाम
कोण कोणाचा भक्त

माहितीचा बाजार भरला
भरून घ्या रे गोणी
का आणि कशासाठी?
विचारू नका कोणी

झेंडे उतरून खांद्यावरचे
बघा भोवती लख्ख..
दोन सोडून अनेक रंग
असतात भोवती चक्क

पंत गेले राव चढले
जुने झाले हो आता
युती करुनी भद्र-अभद्र
मिळून भोगती सत्ता

® प्रशांत शेलटकर
86 00 58 38 46