न्यूटन गांधी आणि...

लहानपणी तो ...

न्यूटन होता

त्याच्याही परसात असत एखादं

सफरचंदाचे झाड..

तर त्यानेही लावला असता

गुरुत्वाकर्षणा सारखा एखादा क्रांतिकारी शोध...

लहानपणी तो...

आईनस्टाईनही होता

अभ्यासात जरा बरा होता

"ढ "असता तर त्यानेही

शोधलं असतं ते समिकरण

e = mc2  अगदी सहज

लहानपणी तो,

एडिसनही होता

फक्त त्याच्या टिचरने

त्याच्या आईला दिली नाही चिठ्ठी

की अशक्य आहे 

तुमच्या मुलाला मला शिकवणे

भलताच मंद आहे तो..

नाहीतर शोधांची हजार पेटंट

त्याच्याच नावावर असती..

लहानपणी तो..

गांधीही होता पण

त्याला त्याच्या स्कुलबसमधून

कोणी बाहेर फेकलेच नाही

नाहीतर त्यानेही केले असते

त्याचे सत्याचे प्रयोग....

लहानपणी तो...

विवेकानंदही होता..

पण त्याने तर चोख पाठ केलं होतं

अध्यक्ष महाशय आणि पूज्यगुरुजनहो...

मनाच्या तळातुन बंधुभागींनीनो

कधी आलंच माही...

बालपण सरल तस

न्यूटन,आईनस्टाईन

गांधी,विवेकानंद

सगळं अलगद बाहेर पडले

आता तो 

सत्याचे प्रयोग करत नाही

आता त्याला

स्वतःचाही शोध  घ्यावासा वाटत नाही...

सफरचंद झाडावरून का पडत?

शतके उलटून गेली उत्तर मिळून

पण अजून एका  प्रश्नाचे उत्तर

त्याला अद्यापही नाही मिळाले

..

जगावं कसं??????

-प्रशांत शेलटकर

8600583846