मागणे

मागणे...

पुस्तकांचे विश्व माझे

त्यातच मला मस्त रमू दे

प्रगल्भतेची एकेक पाकळी

हळूहळू अलवार उमलू दे

व्यक्त होताना स्थळ काळाचे

भान ते अचूक असू दे

बुद्धिवादी तर्कशक्तीला

भावनेचा अंकुर असू दे

ठायी ठायी रडत रहाणे

आता हे संपून जाऊ दे

काळोख दाटला तरी

 एक पणती तेवती असू दे

सगळेच कळत नाही

हेच एकदा कळून जाऊदे

व्यक्त होताना मर्यादांचे

उल्लंघन मात्र कधी नसू दे

जे नव्हतेच आपले

मोह त्यांचा कधी नसू दे

जे खरे आपलेच आहे

ते कळण्याचे भान असू दे

मत प्रत्येकाचे असो वेगळे

मनी समभाव असू दे

मत वेगळे पण शत्रू नव्हे तो

हृदयात स्नेहभाव वसू दे

जगण्याचे अनेक हेतु

खरा हेतू आता कळू दे

विवेकाच्या ओंजळीमध्ये

ज्ञानदीप सतत असू दे

-प्रशांत शेलटकर

 8600583846