मरणाचे क्रियापद

मरणाचे क्रियापद...

 *मरणाराचे स्टेटस ठरवते , मृत्यूच्या बातमीचे क्रियापद..* 

आलेला जीव जातोच पण कोण मरतो यावर त्याची न्यूजव्हॅल्यू ठरते आणि त्याचे क्रियापदही.

 गाडी अंगावर जाऊन एक बाबू नावाचा भिकारी *मेला* 

बाबुराव  जमदाडे यांचे *निधन* झाले.

माजी खासदार बाबूजी जमदाडे आज *पंचत्वात* विलीन झाले.कालच त्यांना *देवाज्ञा* झाली होती

प.पु बाबूजी हे  *निजधामास* गेले.

काल रात्री पोलिसांनी काल्या बाबूचा *एनकाउंटर* केला

त्याने अंडरवर्ल्ड मधील अनेकांचे *गेम वाजवले* होते.

      व्यक्तीचे समाजातले स्थान बघून त्याच्या मृत्यूची बातमी तयार होते.एखादा राजकीय नेता गेला की पोकळी निर्माण होते.हे पोकळी प्रकरण मला अजून समजले नाही. पोकळी कसली डोंबलाची... मेलेला सरणावर असतानाच वारसदार तयार होतात. बरं ही पोकळी फक्त राजकीय नेता गेला की तयार होते. तुम्ही आम्ही गेलो की साधा बुडबुडा पण निर्माण होणार नाही.

   तुम्हीच बघा...हे मीडियावाले पण काय एकेक शब्द वापरतात.. कोण वजनदार माणूस गेला की त्याचे *पार्थिव* अंत्यदर्शनासाठी ठेवतात..आणि आपल्यातल कोण गेलं की आपलेच लोक विचारतात *बॉडी* कधी उचलणार.

     बरं जळताना पण एकेकाचे भाग्य बघा, काहींना *मंत्राग्नी* तर काहींना *भडाग्नी* ...हल्ली कोरोनामुळे काहींच्या नशिबात बेवारस जळण आलं...

प्रत्येकाचा मरणसोहळा वेगळा असतो हेच खरे...

-प्रशांत शशिकांत शेलटकर

 8600583846

माझे इतर लेख आणि कविता यांचा आस्वाद घेण्यासाठी खालील लिंक वर क्लिक करा

http://aksharpooja.blogspot.com/?m=1