आयुष्याचे व्याकरण

आयुष्याचे व्याकरण....

आयुष्याच्या मार्गा चालताना काही माणसं अशी भेटतात की त्याना अगदी  " अवतरणात " ठेवावं.... तर काही माणसे आपल्या आयुष्यात का आली याचे एक भले मोठे "प्रश्नचिन्ह" उभे रहाते. असे असले तरी आयुष्याबद्दल वाईट "उद् गार"  काढू नयेत कधी..कधी दमलो ,निराश झालो तर

 " स्वल्पविराम" अथवा " अर्धविराम" घ्यावा पण नाराज होऊ नये..आयुष्य सरळ कधीच नसतं.. कधी पाय ओढणारे "उकार"असतात पण कधी कधी "वेलांटी" ची सावलीपण मिळून जाते..इथे तर अक्षरांचे पण " पाय मोडले"  जातात तर आपली काय कथा? कोणाच्या तरी आधाराचा "काना" घेतल्या शिवाय  जीवन सुखी करायची "मात्रा" मिळत नाही...सगळे -हस्व , दीर्घ सांभाळले तर गैरसमज होत नाहीत..

     हे सगळं "व्याकरण" सांभाळले आणि उत्तर आयुष्यात "अनुस्वारासारखे" अलिप्त राहून आपल्याच जगण्याकडे पाहिले तर जीवन गाथे चा "पूर्णविराम" सुखद होतो नाही का..

☺️☺️☺️☺️☺️

© प्रशांत शेलटकर

    8600583846