मिसळपाव

मिसळपाव

बशीतल्या पावाला...
मिसळ म्हणाली लाजून
असा दूर का उभा तू
मी तुझ्यासाठी  बसले सजून

पाव म्हणाला दुःखी होऊन
तू तर तिखटजाळ...
सांग कशी जुळायची
तुझी आणि माझी नाळ

मी असा पांढरा फटक
तू किती छान सजली
गालावरती ग तुझ्या
टोम्याटोची लाली आली

कोथिंबीरीचा हिरवा शालू
नवरी छान लाजली...
दंडात रुतली ग तुझ्या
लाल कांद्याची लाल चोळी...

मिसळ म्हणे पावराजा
असं काही नसतं
एकदा प्रेम झालं की,
ते कोणावरही बसतं...

तू किती साधा अन
तू किती सिम्पल...
तूच माझा ऋषी अन
मी तुझी डिंपल.....

पाव म्हणाला मिसळीला
आता एकच आपला गाव
तुला मला एकच नाव
मिसळपाव फक्त मिसळपाव

-प्रशांत शेलटकर