मैत्रिणी

मैत्रिणी,
तुझ्या माझ्यातलं अंतर
तसंच राहूदे..
कारण त्यामुळेच आहे ना
तुझ्या माझ्या अस्तित्वाला,
स्वतंत्र अर्थ...

मैत्रिणी,
नाही म्हणणार तुला मी
ताई , माई आणि दीदी
नाही लावणार तुझ्या नावापुढे
तो नाटकी "जी"
कारण नाटकी उपाधींच्या
पलीकडे आहे आपले नाते...

मैत्रीणी,
कधीच आवडत नाही मला
तुझ्या इनबॉक्समध्ये यायला..
कधीच आवडत नाही मला
तुझी खोटी स्तुती करायला..
कारण तुला तुझी स्पेस आहे
मला माझी स्पेस आहे ...

मैत्रिणी,
तू किती सुंदर आहेस ?
तुझा आरसा सांगेलच तुला
उगाच अस्तिवात नसलेल्या गोष्टी
मी सांगणार नाही तुला..
कारण मी तुझा मित्र आहे भाट नाही

मैत्रिणी,
तू जेवलीस का? तू झोपलीस का?
मला यात स्वारस्य नाही..
माझ्या गुडमॉर्निंग ने तुझी मॉर्निंग
गुड होईल असे वाटतं नाही
कारण कुणाच कुणावाचून अडेल
अस कधी होतच नाही..

मैत्रीणी,
तुझ्या एडिट केलेल्या डीपीत
मला बिलकुल स्वारस्य नाही
त्यापेक्षा बुद्धिबळाचा डाव मांड
गोड गोड नको बोलूस
पण नक्की जोरात भांड
कारण, तुझ्या शरीराशी मला
देणे घेणे नाही..
गावाला ज्या जायचेच नाही
त्याचा पत्ता मी विचारीतच नाही..

मैत्रिणी..........

-प्रशांत शेलटकर,
  रत्नागिरी 8600583846